فى الصالون 4

اتزحلقت فى قشرة موز ، ولاقتنى فى اكتب بالرصاص .. مش عارفة ازاى !!؟راجل جدع موت ، خبطت على بابه وقلت له يا عم .. انا معرفكش و عايزة بقرش ساغ كود علشان احط الساعة فى المدونة ؟؟ قالى خلى القرش ساغ و ادانى قفة فيها شوية اكواد

من غير ما اعرفه اديته الباسوورد بتاعت البلوجر .. وانا فى بالى بقول انا اكيد اتهبلت ، هو انا اعرفه منين ؟؟ ياله هيعمل ايه يعنى ؟؟ هيفرقع البلوج ، يفرقعه ..بلا نيلة .. بس انا احساسى انه شخصية محترمة ...... وكان بها .. فعلا يصدق حدسى

كان له الفضل انى ابدأ فى التعامل مع البلوجراية .. سون فاسون كده كده عادى انه

أكـتــب بالرصاص

انا طبعا فكرت كتير احضر الصالون ازاى ؟ وخصوصا ان ده اول بلوجر لا اعرفه شخصياً قبل دخولى فى عالم البلوجات .. فكرت كتير .. نعمله صالون اماراتى – فخامة ورقى ، ولا صالون مغربى ... و اجيبله بسطيلة الفراخ ... وبعدين قلت له لا لا مش هينفع

صالونى النهاردة هيبقى فى الهوا ... تحت جميزة فى الفلاحين و على حصيرة بلدى و قدمنا صنية كبيرة فيها . مشلتت و مشّ و جعضيض و سيريس و فراخ متحمرة بالسمنة البلدى و عسل اسود و عسل ابيض و قشطة وقالب زبدة وقلة ميه ... وشاى حبر بيغلى فى براد اسود على الأنون ... وللتسالى .. درة و أبو فروة و نشوى........ و احلف عليه بالطلاق انه لازم يخلص صنينة العشا كلها و دكر البط و خمس تجواز حمام
الصورة بتاعته هاعلقها على التوتة اللى هنقعد فيها بعد العشا و هنبتدى الحيواارررررررر

الصراحة : أحممم أحممممم.......... السلام عليكم
اكتب بالرصاص : وعليكم السلام مع الاكرام ورحمة الله
الصراحة : عامل ايه دلوقتى بعد الفطار اللى انت المفروض كلته ؟
اكتب بالرصاص : فطار مين قال إنى فطرت ؟؟
انا بأخد الصبح بسكويت مع شاي و بعد كده قهوة ونسكافيه لحد ميعاد الغدا
الصراحة : الف هنا
اكتب بالرصاص : الف هنا الف هناك .. المهم نبدأ و نلف مترح م نلف


الصراحة : متخيل شكل الصالون ازاى و انت مغمض عنيك دلوقتى و الأغنية اللى شغالة ايه ؟؟
اكتب بالرصاص : انا ما كنتش متخيل اننا هنقعد فى الصالون ... فى الحالات اللى زى كده عادةً بيتم الحوار فى أوضة المكتب ..خلفى مكتبة عامرة بكتب كتير يعلوها تراب كثيف ، وقدامى اباجورة تخفى جزاءً من وجهى ،وعلى يمينى جهاز كمبيوتر ، والأضاءة خافته علشان اللمبة بتشاور عقلها هاتتحرق و عايزة تتغير و الخلفية الموسيقية .. الباعة الجائلين اللى صوتهم واصل من الشباك

الصراحة : جميل ... ايه اللى خلاك تبقى مدون وليك مدونة ؟ و سبب تسميتها ؟
اكتب بالرصاص : انا مش مدون !!!!؟
الصراحة : طيب بتصنف نفسك ايه ؟
اكتب بالرصاص : انا صاحب موقع او عضو فى منتدى ..ليه بنصنف جماعة المدونون او المدونات ؟؟ انا اهوى الكمبيوتر ، وكان ليا موقع من قبل من سبع سنين و لكن اهملته ورجعت من جديد عن طريق المدونات لأنها اسهل فى الادارة بس

الصراحة : تفتكر فيه فرق بين أن يكون عندك موقع وأن يكون عندك مدونة ؟
اكتب بالرصاص : ابدا الاتنين واحد .. لكن مع المدونة بيكون التفاعل مباشر مع مرتادى الموقع
الصراحة : طيب .. سر تسمية المدونة ايه ؟؟
اكتب بالرصاص : التغيير ... حاجات كتير فى حياتنا ، أو فى أوطاننا محتاجة للتغيير . و التغيير يا اما يكون بالرصاص .. او بالرصاص !!؟سلوكيات ، أوضاع ، حكومات
الصراحة : وانت بتميل اكتر لأنه نوع من الرصاص ؟
اكتب بالرصاص : فيه حاجات بتتغير بالقلم الرصاص ، و التأثير فيها بيكون أشد من طلق الرصاص ..وفيه حاجات لا ينفع معاها إلا الرصاص ..والرصاص لا يعنى بطبيعة الحال العنف ، احيانا القلم الرصاص بيكون أعنف من الرصاص الحى

الصراحة : جميل
اكتب بالرصاص : الله يجملك

الصراحة : فى اول مدونتك كانت التعلقيات .. اتنين او تلاتة ... وبعد كده بسم الله ما شاء الله ، بقت بأعداد جيدة بتصل الى الاربعينات .. ايه البوست اللى خلى التعليقات تتتسارع كده وبقى ليك شعبية زى كده ؟
اكتب بالرصاص : همممممم !!!؟ ممكن ارجع للمدونة !؟
الصراحة : اتفضل ..بس اللى أقصده احساسك .. احساسك انه بوست هو الى غير عداد الزوار ؟
اكتب بالرصاص : كده السؤال مش واضح .. موضوع التغير عمره ما بيجيى من بوست واحد يكون هو الفارق ، مسألة وقت
الصراحة : يعنى كل واحد بيكتب مواضيع كتيرة .. فيه بوست ما بيبقى عن موضوع معين .. فكرة معينة ..هى اللى بيحرك عداد الزوار .. ده قصدى
اكتب بالرصاص : اعتقد ان الموضوع اللى قلب عداد الزوار كان أم الدنيا .. كان فيه تفاعل كبير من القراء ومناقشات و اختلافات .. اشربى العصير الأول
الصراحة : ( ابتسامة ) ده واجب علينا

اكتب بالرصاص : احنا عندى ولا عندك ؟

الصراحة : عندى فى الصالون بتاعى !!!!؟
اكتب بالرصاص : امال المكتب اللى قعدت ساعة اشرح فيه فوق ده كان فين ؟
الصراحة : ده تخيلك لشكل الصالون وانت مغمض ..لكن الصالون ليه ميزته .. ممكن يتحط فيه أى حاجة .. الصالون فكرته ثقافية ..بس لازم أسال الضيف و انا اللى بحط الفرش قبل الحوار
اكتب بالرصاص : طيب ممكن توصفى لي الصالون عندك دلوقتى !!مع الخلفية لو سمحت
الصراحة : بعد أذنك ..بحب أعمله مفاجأة .. نكمل
اكتب بالرصاص : طيب اتفضلى ... بس أنا بأشربها سادة
الصراحة : أوكيه

الصراحة : هل بتعتبر الكوميديا اللى بتستخدمها فى مواضيعك ، زى كوميديا نجيب الريحانى ؟
اكتب بالرصاص : وأنت بتعتبري اللى أنا بكتبه ده كوميديا .. الكوميديا انك تضحكى لدرجة الاستلقاء على القفا .. واعتقد أن ولا واحد من رواد المدونة بعت لى شكوى أن قفاه بيوجعه
انا بتكتب بطريقة تخلى القارئ ما يملش .. مش أكتر .. بأحط نفسى مكانه
انت شايفة ان بلوجى بلوج كوميدى !!!!؟
الصراحة : نجيب الريحانى كان من منتقدى الأوضاع بكل أحوالها عن طريق الكوميديا وبيطلق عليها الكوميديا السوداء .. و أنا فى اعتقادى انك واخد الخط ده .. علشان برضه القارئ ميملش.. الفكرة انك توصل هدف او مشكلة بطريقة كويسة يتقبلها القارئ
اكتب بالرصاص : طيب
الصراحة : مش عجبك رأيى ؟
اكتب بالرصاص : ايه اللى وصلك الاعتقاد ده ؟؟ مش بيقولوا السكوت علامة الرضا
الصراحة : طب كويس ..بأستثناء وجهة نظرى لأن فى الصالون .. الضيف رقم واحد
نرجع مرجوعنا
اكتب بالرصاص : امشى يعنى !!!؟
الصراحة : استنى بس ... كتبت كام قصة فى المدونة ؟
اكتب بالرصاص : عديهم
الصراحة : طيب أيهم أكثر استمتاعا ً ليك ؟
اكتب بالرصاص : ولا واحدة
الصراحة : ايه اللى خلاك تكتبهم ؟
اكتب بالرصاص : ساعة ما كتبتهم .. كنت باستمتع بكتابتهم ، دلوقتى خلاص مليت من قرائتهم .. ماعدش فيه استمتاع زى الاول ...تقصدى القصص ... صح ؟ مش البوستات

الصراحة : اقصد القصص فى المدونة زى مملكة اوز ؟

اكتب بالرصاص : راجعى الاجابة أعلاه ..بس أكثرهم ايلاماً ليا .. دينا - الصلصال .. دائما عيونى بتدمع كلما قرأتها

الصراحة : ننتقل لى نقطة تانية

اكتب بالرصاص :وماله

الصراحة : هل اصبح اى موضوع سياسي أو مهاجمة للأخر زى الأمريكان وغيره ، لابد أن يحتوى على قذف و سب والى أخره - مثل موضوع الفيتو الأمريكى عندك ؟

اكتب بالرصاص : موضوع الفيتو ، انا مجرد وضعت صورة ـ،تلخص و تعبر عن الفيتو كما تصورته ويتصوره الأمريكان أنفسـهـم

الصراحة : طيب -- ما رايك فى الساحة البلوجية الفترة دى ؟؟ بوجه عام
اكتب بالرصاص : حلوة ، وواسعة تستوعل كل حاجة ، ولغاية دلوقتى لم ألاحظ أى خناقات ظاهرية و تحزبات .. كله بيقول اللى عنده
في شوية مجاملات ...اه
في شوية خروج عن النص... اه
في شوية هبل...اه
في شوية رومانسيات زايدة .. اه
بس اهم حاجة نفضل اخوات(محمد صبحي في ماما امريكا).....اللي بعده

الصراحة : ضحكة صافية .. بوست اتكلمت فيه عن ولادك .. هل انت حابب اوى ان الناس تشوف عالمك الجوانى ولا بتكتب فيه اللى انت حاسه وبس ولا بتنور على حتت معينة الناس المفروض تشوفها فى حياتها ؟
أكتب بالرصاص : واضح أنك فصصتى المدونة فى بداية الحوار قلت أن هدف المدونة التغيير ، وسلوكياتنا مع الأبناء بعضها لازم يتغير ..موقف حصل ، حسيت أنى تلقائى فيه ، حبيت الناس كلها تعيش نفس اللحظة والرسالة ... هى .. أزاى نعامل الأولاد بما يحقق المتعة لنا ولهم

الصراحة : على الصف اليمين .. فيه لينك اسمه مدونات تستاهل.. اخترتهم ازاى ؟
اكتب بالرصاص : لأنهم يستاهلوا فعلاً .. القائمة الجانبية دى .. تعتمد على
ما يقدم فى المدونة ، احترامها للأخر ، عدم الأسفاف ، القيمة ، الطرافة النظيفة

الصراحة : فيه بوستات كتيرة اوى عندك عن مصر .. منها اكتشاف انسانيات زى قلوب مصرية و منها الانتقادى البناء الهادى زى ام الدنيا ..... بتفتكر مصر ازاى وشايفاها ازاى دلوقتى ؟
اكتب بالرصاص : أفتكر مصر !!؟ أزاى !!!!! ؟
حلوة برغم كل ما فيها من سيئات
عروسة رغم الشيب اللي في شعرها
دافية رغم برود اولادها
واشوفها ازاي؟
مش شايفها !!؟
مصر بتتضائل
الصراحة : مصر ولا جوه مصر ؟؟ يعنى البلد ولا الأفعال ؟
اكتب بالرصاص : جوه وبره ...الأفعال هى اللى بتعمل مصر

الصراحة : اول ما بتفرك عنيك فى المكتب والكمبيوتر ينور .. مين أول بلوج بتدخل عليه ؟؟
اكتب بالرصاص : بلوجى طبعا
الصراحة : وبعده ؟
اكتب بالرصاص : حسب التعليقات و القائمة اللى على اليمين من بلوج لبلوج ، وهكذا

الصراحة : فيه سؤال توقعت أنى أسئله و مسألتوش ؟؟
اكتب بالرصاص : اسئلة كتيرة
الصراحة : اذكر اكتر واحد مُلح عليك دلوقتى
اكتب بالرصاص: تحب تشرب أيه !؟ كنوع من كرم الضيافة وان كان مجاملة
و السؤال الأخر .. أكلاتى المفضلة
الصراحة : ( ابتسامة ) الحاجات دى اجبارى هتشوفها فى التقديمة
اكتب بالرصاص : طيب

الصراحة : سؤال اخير ، هتكتب بالرصاص ؟
اكتب بالرصاص : أتمنى أنى أفضل أكتب بالرصاص

الصراحة : تشرفت بيك و بالحوار .. ونتمنى نشو ف تعليقك على شكل الصالون لما تخلع الغمامة من على عينيك و تشوفه فى البلوج
اكتب بالرصاص : غمامــة !؟ هو احنا كنا فين !؟
الصراحة : فى الصالون .. ما انت مغمض عنيك طول الصالون
اكتب بالرصاص : على كل حال ، احب اشكرك ، انت مشروع صحفية واعد واسلوبك رائع
و طويلة البال مع البلوجرية المتعبين أمثالى .. وده هيوصلك لمكانة عالية أن شاء الله
الصراحة : ( ابتسامة ) متشكرة ليك

أغنية الصالون : المسداوية – على الحجار

exclusive من أكتب بالرصاص